Your English Voice müsabiqəsinin imtahan məkanı elan olunur!

Hörmətli tələbələr,

Təhsil Nazirliyinin SABAH qrupları layihəsi və “British Council Azərbaycan”ın birgə təşkilatçılığı ilə keçirilən “Your English Voice” ingilis dilli müsabiqəsinin birinci mərhələsində 57 ixtisas üzrə 438 tələbə elektron qeydiyyatı müvəffəqiyyətlə tamamlamış, 403 tələbənin müraciəti təsdiqlənmiş, 35 tələbənin müraciəti isə müsabiqə qaydalarına uyğun olmadığı üçün ləğv edilmişdir.

Your English Voice müsabiqəsinin ikinci mərhələsi (test imtahanı) 23 FEVRAL 2020-ci il tarixində Azərbaycan Dövlət İqtisad Universitetində (İçərişəhər m/s yaxınlığı, İstiqlaliyyət Küçəsi 6) keçiriləcəkdir. 

Tələbələrin otaqlar üzrə bölgüsü haqqında məlumatı buradan əldə edə bilərsiniz.

________________________________________________________________________________

DİQQƏT! İMTAHAN IŞTIRAKÇILARININ NƏZƏRİNƏ:

• İmtahan saat 10:00-da başlayacaq.
• İmtahan günü saat 9:30-dan gec olmayaraq imtahanın keçiriləcəyi yerdə olmalısınız.
• İmtahana gələrkən sənəd qismində özünüzlə yalnız şəxsiyyət vəsiqənizin əsli və ya surətini gətirməlisiniz. Əks hada imtahana buraxılmayacaqsınız.
• İmtahan prosesində meydana çıxan hər hansı bir problemlə əlaqədar imtahan otağındakı nəzarətçiyə müraciət etməlisiniz.

İMTAHAN GÜNÜ QADAGANDIR:

• saxta sənəd təqdim etmək;
• imtahana mobil telefon, kalkulyator, xarici yaddaş qurğuları, konspekt, lüğət, cədvəl, məlumat kitabçası və digər yardımçı vasitələr gətirmək və onlardan istifadə etmək;
• yandırıcı, partlayıcı, kəsici, deşici, atıcı və digər bu növ əşyalarla imtahan binasına girmək;
• sual kitabçaları paylandıqdan sonra hər hansı bir səbəbə görə imtahan zalını tərk edib yenidən geri dönmək;
• nizam-intizam qaydalarını pozmaq;
• zalda yerini dəyişmək, gəzişmək, yerindən durmaq və bu kimi hallarla imtahanın gedişinə mane olmaq;
• başqasının “Cavab kağızı”na, “Sual kitabçası”na baxmaq və ya öz “Cavab kağızı”na, “Sual kitabçası”na başqasının baxması üçün şərait yaratmaq;
• nəzarətçiyə test tapşırıqlarının həllində kömək üçün müraciət etmək;
• “Cavab kağızı”nı nəzarətçiyə təhvil vermədən imtahan otağını tərk etmək. 

Belə hallar aşkar olunarsa həmin tələbə xəbərdarlıq olunmadan imtahandan xaric olunacaq və onun imtahan nəticələri ləğv olunacaqdır.  

İmtahan nəticələri 10 iş günü ərzində www.sabah.edu.az saytında paylaşılacaqdır.

 ________________________________________________________________________________

Qeyd edək ki, “Your English Voice” müsabiqəsi Bakı şəhərində yerləşən dövlət ali təhsil müəssisələrinin 2-ci və 3-cü kurs tələbələri arasında keçirilir. Müsabiqənin təşkilində əsas məqsəd tələbələr arasında sağlam rəqabət mühitinin yaradılması yolu ilə ingilis dilinin öyrənilməsinə, eləcə də müxtəlif tipli bilik yarışlarına olan marağının artırılmasıdır.

Müsabiqənin bütün mərhələlər üzrə qalibləri Birləşmiş Krallığın ən qabaqcıl dil məktəblərindən  biri olan “International House Manchester”-də 2 həftəlik ingilis dili kursunda iştirak etmək imkanı əldə edəcəklər.