SUAL 1. SABAH qruplarının statusu necə olacaq?
CAVAB:  SABAH qrupları Təhsil Nazirliyinin tabeliyində olan ali təhsil müəssisələrində yaradılacaq, dərs deyən müəllimlər isə əsasən ali təhsil müəssisələrindən seçiləcək. Bu tələbələr üçün fərqli mühit, fərqli şərtlər və fərqli gələcək təmin ediləcək.
SUAL 2. SABAH qruplarına seçim necə aparılacaq?
CAVAB:   Seçim Azərbaycan Respublikasında fəaliyyət göstərən 33 ali təhsil müəssisələrinin (xüsusi təyinatlılar istisna olmaqla) I tədris ilinin I semestrinin nəticələrinə görə orta müvəffəqiyyət göstəricisi 61 baldan aşağı olmayan tələbələri arasında aparılacaq.
SUAL 3. SABAH qrupları hansı ixtisaslardan seçiləcək?
CAVAB:  Mövcud 8 ixtisas qrupundan 5-i üzrə seçiləcək. Bunlar təhsil,təbiət,humanitar və sosial, iqtisadiyyat və idarəetmə, texniki və texnoloji ixtisas qruplarıdır. SABAH qruplarına seçim bu ixtisas qruplarına daxil olan 60 ixtisas üzrə aparılacaq.
SUAL 4. Niyə 8 ixtisas qrupunun ancaq 5-dən seçiləcək?
CAVAB:  Seçim TN-nin tabeliyində olan ali təhsil müəssisələrində təhsil alan tələbələr arasında aparılacaq. Kənd təsərrüfatı və səhiyyə, rifah, xidmət ixtisas qrupları üzrə kadr hazırlığı aparan ali təhsil müəssisələri isə TN-nin tabeliyində deyil. Həmçinin, mədəniyyət və incəsənət ixtisas qrupunda təhsil alanlar xüsusi qaqbiliyyətə malik olduğundan və fərdi hazırlıq tələb etdiyindən bu ixtisas qrupu da seçimə daxil edilməyib.
SUAL 5. SABAH QRUPLARINDAKI TƏHSILIN DIGƏR ADI QRUPLARDAKI TƏHSILDƏN FƏRQI NƏ OLACAQ?
CAVAB:   SABAH qruplarında xarici dil biliklərinə ciddi diqqət yetiriləcək, ixtisas dərslərinə daha çox diqqət ayrılacaq və tədris fərqli üsullarla aparılacaq, həmçinin dərslərin bir hissəsi xarici dildə tədris olunacaq.
SUAL 6. SABAH-IN TƏLƏBƏLƏRINƏ TƏQAUDLƏR VERILƏCƏK?
CAVAB:  Bəli. SABAH qruplarında təhsil alan əlaçı tələbələr üçün 70 manat, digərləri üçün 50 manat məbləğində aylıq SABAH təqaüdü təsis edilmişdir.
SUAL 7. AYLIQ SABAH TƏQAÜDÜ HANSI HALDA DAYANDIRILA BILƏR?
CAVAB:  Əvvəlki tədris semestrindəki akademik borca görə növbəti tədris semestrində tələbəyə verilən aylıq SABAH təqaüdü dayandırılacaqdır.
SUAL 8. SABAH-IN TƏLƏBƏLƏRINƏ KIMLƏR DƏRS DEYƏCƏK?
CAVAB:  SABAH-ın tələbələrinə ali təhsil müəssisələrində işləyən professor-müəllim heyətindən seçiləcək müəllimlər dərs deyəcək.
SUAL 9. ƏCNƏBI MÜTƏXƏSSİSLƏR DƏRS DEYƏCƏKMI?
CAVAB:  Xarici universitetlərdən mütəxəssislər dəvət olunacaqlar. Onlar əsasən xarici dil dərslərinin və ixtisas fənlərinin xarici dildə tədrisinə cəlb olunacaq.
SUAL 10. SABAH QRUPUNA EHTİYAC NIYƏ GÖRƏ YARANIB?
CAVAB:  Bu gün ali təhsildə fərqli mühitin yaradılmasına böyük ehtiyac var. Biz çalışırıq ki, Respublika üçün xaricdə kadr hazırlığını tədricən Azərbaycan ali təhsil müəssisələrində təşkil edək və bununla da tədrisin səmərəliliyini yüksəldək.
SUAL 11. SABAH QRUPLARININ TƏLƏBƏLƏRİ HANSI UNIVERSİTETLƏRDƏ TƏHSİL ALACAQLAR?
CAVAB:  SABAH-ın tələbələri elmi-pedaqoji potensialı və tədris-laboratoriya bazası yüksək səviyyədə olan universitetlərdə təhsil alacaq. TN tərəfindən hazırda müəyyən olunmuş 7 ali təhsil müəssisəsi bunlardır: BDU, ADİU, AzTU, AzMİU, ADNA, ADPU, ADU.
SUAL 12. BÖLGƏ UNIVERSITETLƏRINDƏN SEÇIM NECƏ OLACAQ?
CAVAB:  SABAH-a qəbul üçün müsabiqədə seçimin tələblərinə uyğun gələn bütün tələbələr o cümlədən bölgə universitetlərinin tələbələri də iştirak edə bilərlər.
SUAL 13. NIYƏ 60 IXTISASI SEÇMISINIZ?
CAVAB:  Digər ixtisaslar üzrə təhsil alan tələbələrin sayı az olduğundan seçim imkanı yaranmır. Buna görə də 60 ixtisas müəyyənləşdirilib.
SUAL 14. DÜNYADA BELƏ BIR MODEL VARMI?
CAVAB:  Cənubi Koreyada, Malayziyada, Niderlanda, Sinqapurda və bir çox inkişaf etmiş ölkələrdə xüsusi seçim əsasında tələbə qrupları və tədrisin təşkili təcrübəsi mövcuddur.
SUAL 15. BURADA OXUYAN TƏLƏBƏLƏR XARICDƏ TƏHSILLƏ BAĞLI IMTIYAZLARA MALIK OLACAQMI?
CAVAB:  Bu, xaricdə təhsil almaq üçün mövcud qaydaların tələblərinə uyğun mümkündür.
SUAL 16. SABAH QRUPLARINDAN TƏLƏBƏ XARIC OLUNA BILƏRMI?
CAVAB:  SABAH qruplarında təhsil kredit sistemilə tədrisin təşkili Qaydalarına müvafiq olaraq həyata keçiriləcək. Başqa sözlə tələbə akademik borca görə xaric olunmayacaq.
SUAL 17. SABAH QRUPLARINDA BIZIM DƏRS DEMƏYƏ MÜƏLLIM HEYƏTIMIZ VARMI?
CAVAB:  Ali məktəblərdə SABAH qruplarında dərs deyə biləcək hazırlıqlı müəllim heyəti mövcuddur.
SUAL 18. SABAH QRUPLARININ MƏZUNLARININ DIPLOMU
CAVAB:  Bu məzunların diplomları adi qruplarda təhsil alan tələbələrin diplomu ilə olacaq, lakin diploma əlavələr fərqlənəcək.
SUAL 19. Digər ali təhsil müəssisələrindən SABAH qruplarına qəbul olan tələbələr hansı ali təhsil müəssisəsinin diplomunu alacaq, ilk qəbul olduğunun yaxud SABAH qrupunun baza ali təhsil müəssisəsinin diplomunu?
CAVAB:  SABAH qruplarına qəbul olmuş tələbələr baza ali təhsil müəssisəsinə mərkəzləşdirilmiş formada köçürüləcəklər və müvafiq olaraq köçürüldükləri ali təhsil müəssisəsinin diplomunu alacaqlar.
SUAL 20. SABAH qrupları xaricdə təhsilə olan marağa necə təsir edəcək?
CAVAB:  SABAH qruplarında təhsil mühiti və səviyyəsi xaricdəki təhsilə bərabərləşdiyi halda tələbələr burada təhsil almağa daha çox üstünlük verəcəklər.
SUAL 21. SABAH qruplarında dərs deyən müəllim fərqli maaş alacaq?
CAVAB:   Bu qruplarda dərs deyəcək müəllimlərin əmək haqqı fərqlənəcək, lakin bu qruplarda dərs demək hər bir müəllim üçün ilk növbədə bir nüfuz məsələsidir.
SUAL 22. Bolgədən olan tələbələrə yataqxana veriləcəkmi?
CAVAB:  SABAH qruplarına bölgə universitetlərindən qəbul olan tələbələr yataqxana və yeməklə təmin olunacaq. Lakin bu yerlər məhduddur.
SUAL 23. SABAH qruplarında ixtisas dəyişmək mümkündürmü?
CAVAB:  Xeyr. İxtisas dəyişilməsi mümkün deyildir.
SUAL 24. SABAH qruplarına qəbul nəticəsində ali təhsil müəssisəsini dəyişən ödənişli tələbə hansı ali təhsil müəssisəsinin ödənişini ödəməlidir?
CAVAB: Bu halda, tələbə köçürüldüyü ali təhsil müəssisəsinin müvafiq fakültə üzrə həmin kursuna tətbiq olunan təhsil haqqını ödəməlidir.